am letschte ziischtig bini im irchel is chrafttraining und es hät soo vill elteri lüüt gha, dass d'studente grad so chli i underzahl gsi sind. jetz, im irchel-chraftruum häts immer rächt vill elteri lüüt und ich finds uu guet, wänns au chli bi eus a de uni mitmisched und im alter na so aktiv sind (ob körperlich im asvz oder ehner chopflaschtig ade seniore-uni). vor allem schätz ichs aber au sehr, wänns so amüsanti gspräch mitenand füehred und dur ihri unterhaltige mini ziit im chraftruum so churzwiilig wird. anderi perspektive z'ghöre isch doch immer hilfriich, odr?
einewääg, a dem ziischtig, häts vor luuter seniore chum meh platz gha ade gräät, aber immerhin chamer mit de seniore liechter afah rede (wills doch chum je seniore mit iphone-stöpsel i de ohre git) und fräge, öb mer rasch chöni abwächsle.
woni grad wieder emal am umestah gsi bin und gwartet han, bis s'eint gräät frei worde isch hät mi ä seniorin aagsproche, öb ich ihre nöd rasch chöni mit de iihstellige hälfe, si seg ersch s'zweite mal da und chöm halt nani so schüüli guet druus. ich bi glaub na nie so charmant um hilf gfrägt worde... si isch sicher so zwei chöpf chliner gsi als ich aber ihres lache isch defür umso grösser gsi. perfekt gschminkt (roote lippestift isch scho vo zentraler bedüütig im chraftruum ;), perfekt frisiert, chic, aber glich praktisch aagleit und si hät sogar schüch nach parfüm gschmöckt. aso, wänn ich je öpper wür als ächti lady bezeichne, wärs wahrschinli si. natürli hani ihre rasch erchlärt, welli hebel si brucht zum s'gräät so verstelle, wies es ihre bi de iifüehrig uf de zättel gschriebe händ und nachdem si sich herzlichscht (und liächt übertriibe) bi mir bedankt hät, bini wiiter. woni chli später gseh han, wie si mit ihrem maa diskutiert drüber, wie mer s'nächschte gräät muen iistelle ("was meineds jetzt au scho wieder mit 'zweite winkel'?"), bini rasch zuene ane und ha namal rasch gholfe, woruf mich ihre maa, agstraahlt hät und anerkännend gfunde hät: "aso, si wäred scho en uusgezeichneti instruktorin!" was mich wiederum natürli scho chli gfreut hät. di beide händ nacher grad zum gräät gwächslet, woni grad drufgsässe bin und wo d'frau vo mine 45 uf 15 kilos umgstellt hät, güggslet doch de maa ihre über d'schultere und seit zu mir: "sehr sportlich, sehr sportlich", und d'frau findet dezue ane na: "wüssed si, ich wett ebe au emal sooo starch werde wie si, drum bini da!"
ja, ich mag elteri lüüt, nur si chönd eim schaamloos übertriibe schmeichle und au wänn eim d'übertriibig voll und ganz bewusst isch, lauft mer gliich mit eme lache vo eim ohr bis zum andere und drüümal glücklicher als vor de begägnig devo.
aso, ohrstöpsel use und offe sii gegenüber guet gluunte eltere lüüt! los!
aso, ohrstöpsel use und offe sii gegenüber guet gluunte eltere lüüt! los!
